लिलाकान्त यादव,
राजविराज, ०८ असार ।
 सप्तरीको हनुमाननगर कंकालिनी नगरपालिका–१ स्थित कोसी बाँध नजिकै आइतबार बिहान भएको मोटरसाइकल दुर्घटनामा एक जनाको घटनास्थलमै मृत्यु भएको छ भने दुई जना घाइते भएका छन्।
बिहान ५ः२० बजे, कंकालिनी मन्दिरदेखि करिब एक किलोमिटर उत्तर कोसी बाँधमा दुई मोटरसाइकल आपसमा ठोकिँदा यो दुर्घटना भएको हो।
दुर्घटनामा कञ्चनरुप नगरपालिका–१, बैरवाका २५ वर्षीय सुभाष कुमार महतो को स्प्लेंडर मोटरसाइकल (को १० प ५००६२) र विपरीत दिशाबाट आइरहेको अर्को मोटरसाइकल (बा ५५ पो ६६३९) एकआपसमा ठोकिएको प्रहरीले जनाएको छ।
घटनामा दोस्रो मोटरसाइकलमा सवार एक जनाको घटनास्थलमै मृत्यु भएको छ भने सुभाष महतो गम्भीर घाइते भएका छन्। मृतकको पहिचान खुल्न बाँकी रहेको प्रहरीको भनाइ छ।
त्यसैगरी, घटनामा संलग्न तेस्रो व्यक्ति पनि सामान्य घाइते भएका छन्।
घाइतेहरूलाई प्राथमिक उपचारपछि विराटनगरतर्फ रेफर गरिएको छ भने मृतकको शव पोस्टमार्टमका लागि गजेन्द्र नारायण सिंह अस्पताल, राजविराज पठाइएको छ।
दुवै मोटरसाइकल इलाका प्रहरी कार्यालय भारदहको नियन्त्रणमा राखिएको छ र दुर्घटनाबारे थप अनुसन्धान भइरहेको प्रहरी स्रोतले जनाएको छ।
स्थानीयहरूका अनुसार उक्त सडकखण्ड बिहान–बेलुका दृश्य कम देखिने स्थान हो र गति नियन्त्रणमा नहुँदा यस्ता दुर्घटना दोहोरिने गरेका छन्। प्रहरीले दुर्घटनाको कारणबारे थप विवरण संकलन गरिरहेको छ।

प्रतिक्रिया